Курык марий районысо яллашке газ толын шуэш
Курык марий районысо яллашке газ толеш. Районысо икмыняр ялыш тенийсе икымше пелийыште газым пуртымо лиеш. Газым мыняр пуртымо- тиде кундемым социально- экономически вияҥдыме кӱкшытым ончыкта. Курык марий район тидын шотышто изиш почеш кодеш. Республике мучко 89 наре процент калыкым канде тул дене авалтыме гын, Курык марий районын 82, 47 процент илемлашкыже пуртымо. Тидын нерген Правительстве пӧртыштӧ эртыше заседанийыште ойлымо ыле. 30-шо июнь марте Пынгель Кугилансола ялыш канде тул толын шушаш. Тидлан район ик миллионат 200 тӱжем теҥгем ойыра. Революций выселкылан кум миллионат 700 тӱжем теҥге, Цигансола ял ден Сивикасола выселкылан куд миллионат 200 тӱжем теҥге ойыралтеш. Тыгак газым Лапсолаш, Исуткансолаш, Аматисолаш, Йынгель Парнингашыш, Пынгель Усолаш, Макарсирыш, Йынгельмычашыш, Порандай яллашке пурташ палемдыме.
