Марий Эл гыч туныктышо Российысе финанс конкурсышто сеҥышыш лектын
Марий Кугыжаныш университетын преподавательже Надежда Курочкина Российысе конкурсышто «Профессийыште эн сай» номинацийыште ончыл верым налын. Кодшо кечылаште финанс рынкысе специалист- влакын профессионал мастарлыкыштым тергыме Россий кӱкшытан «ФинСкиллс Раша» конкурсышт иктешлалтын. Тушто шке усталыкыштым пӱтынь эл гыч кум тӱжем наре еҥ ончыктен. Сеҥыше- влакым икмыняр номинацийыште палемденыт. «Профессийыште эн сай» номинацийыште «Бухгалтер учёт» корно дене Марий университетын экономике, управлений да финанс институтшын экономике кафедрыжын кугурак туныктышыжо Надежда Курочкина сеҥышыш лектын.
