Ялысе кундемлан льготан икымше ипотеке кредитым пуэныт
Республикыштына «Ял кундемлам комплексно вияҥдымаш» кугыжаныш программе почеш талукышто 2,7 процент льготан ставке дене икымше ипотека кредитым пуымо. Кредитым Параньгаште илыше еҥ пӧрт ден мланде участкым налаш возыктен. Россельхозбанкын марий филиалжым вуйлатыше Георгий Сергеевын мутшо почеш, ял кундемлам вияҥдымаш приоритет задачыш пура. Сандене тыгай у финанс продуктын лекмыже куандара. Ялыште илыше- влак илыме йӧныштым саемден, сурт озанлыкыштым тӱзатен кертыт. Кызыт Россельхозбанкын марий филиалыштыже кугыжаныш программе почеш 265 йодмаш ончалтеш. Нунын тичмаш акышт 487 миллион теҥгеш шуэш.
