Ава капитал гыч тылзе еда оксам налаш лиеш

Марий Элыште 430 еш ава капитал гыч тылзе еда оксам налеш. Тенийсе кок тылзыште Пенсий фондын верласе органышкыже тылзе еда оксам налаш 274 йодмаш пурен. Тушечын 139 ешыже оксам умбакыжат налаш уэш йодмашым возен. Тачысе кечылан тыгай йӧн дене 430 еш пайдалана. Тений гыч тыгай оксам налаш правалан парышын кугытшым ешарыме. Ешыште кокымшо йоча 2018-ше ий январь гыч шочын  гын, а ешыште ик еҥлан шотлымаште парыш илен лекташ ситыше оксан кок кугытшым ок эрте гын, тыгай еш тылзе еда тиде оксам налын кертеш. Марий Элыште тудым 20 тӱжемат 996 теҥгем палымдыме, а тылзе еда пуымо оксан кугытшо 10 тӱжемат 66 теҥге лиеш. 2020-шо ий гыч эше ик вашталтыш пурен: оксам кум ий марте тӱлат. Тылзе еда тӱлаш йодмашым йочан кум ияш лиймешкыже кеч-могай жапыште пуаш лиеш. Йоча шочмеке икымше куд тылзыште йодмашым пуаш гын, оксам шочмо тылзе гычак тӱлат. Пел ий деч вара йодмашым возаш гын, оксам возымо жап гыч пуат.

Прошлые выпуски