Российысе кычалше студент отряд- влакын слётышт Йошкар-Олаште лиеш
Йошкар-Олаште 12-шо гыч 15-ше март марте кычалше студент отряд- влакын Россий кӱкшытан 5-ше слётышт лиеш. Тушко элысе 40 кундем гыч 150 утла кычалше толшаш. Тиде кугу мероприятийым эртараш ямде улмо шотышто Республикым вуйлатыше Александр Евстифеев Правительстве пӧртыштӧ совещанийым эртарен. Спорт туризм министр Лидия Батюкован мутшо почеш, республикын кычалше толкынжым Российыште кӱкшын аклыме. Санденак тиде мероприятийым лач Марий Элыште эртараш кутырен келшыме. Кычалше отряд- влак уло Россий гыч толыт. Мероприятийыш тӱвыра программе да тудым торжественно почмаш пура. Тӱҥ пашаже Марий университетысе «Точка кипений» площадкыште лиеш. Тудым эртараш оксам федерал да республикысе бюджет ойырат. Ректор Михаил Швецовлан уна- влакым вашлияш чыла ямдылен шукташ кӱштымӧ. Слётышто кычалме пашаште кучылташ мландым тора гыч зондироватлыме у методым ончыктат. Тудым Марий университет шке шонен луктын да ямдылен. Тиддеч посна кычалме паша опыт негызеш историк- влакым туныктымо у йӧн- влакым каҥашат, кычалше студент отрядлашке самырык тукымым ушен, патриотизм шӱлышеш шуарыме у метод- влакым ончат. Слётым торжественно почмаш 12-шо мартыште Республикысе курчак театрыште эрта. Тудо Кугу Сеҥымашлан 75 ий теммым палемдыме мероприятий- влакын планыштым шыҥдарыме радамыш пура.
