Лӱмлӧ тележурналист да вӱдышӧ илыш дене чеверласен

Лӱмлӧ тележурналист да вӱдышӧ илыш дене чеверласен
                Тиде увер- ойган. Теҥгече мемнан колегына, Марий телевиденийын ончычсо пашаеҥже, Марий Эл тӱвыран сулло пашаеҥже Любовь Семёновна Борисова (Пальминова) илыш дене чеверласен. Тудо 67 ийыш тошкалын ыле. 1979-ше ий гыч тӱҥалын 30 ий утла Марий телевиденийыште пашам ыштен. Ятыр телепрограммым йоча, самырык, да кугыеҥ- влаклан устан, моштен, уло чонжым пыштен ямдылен да вӱден. Нунын коклаште «Кумыл корно», «Шуматкечын кастене», «У ий дене!», «Шӱмсем пӧлек» улыт. Ятырже Марий телевиденийын шӧртньӧ фондыштыжо аралалтеш. Любовь Семёновнан экраныш лекмыжым эреак вученыт да уло кумылын йӧратен онченыт. Тиде пеш проста, весела шинчаончалтышан Медведево кундемын шочшыжым марий калык кугун пагален.                       
          Марий Эл ГТРК-н икоян коллективше родо-тукымжылан, лишыл палымыже, пырля тунемме йолташыже- влаклан кугу чаманымашым каласа да умбакыжат порын гына шарнаш тӱналеш. Любовь Борисова (Пальминова) дене дене чеверласымаш эрла, 18-ше октябрьыште, Йошкар-Оласе моргын чеверласымаш залыштыже 10 гыч 11 шагат марте лиеш.
      Фото: Павел Стариков.

Прошлые выпуски