Марий Эл Кугыжаныш Погынын тӱҥ сессийже лийын

Марий Эл Кугыжаныш Погынын тӱҥ сессийже лийын
Таче Марий Эл Кугыжаныш Погынын визымше бюджет сессийже пашам ыштен. Тудын повесткышкыже 16 йодышым пуртымо. Депутат- влак шушаш кум ийлан республикым социально- экономически вияҥдыме прогнозым, шушаш да 21-ше-22-шо ий- влаклан республикын бюджетше да обязательный медицина страхований фондын бюджетше нерген законым пеҥгыдемденыт. 2020-шо ийлан парыш 35 миллиард утла лийшаш, 21-ше ийлан 33 миллиард, 22-шо ийлан- 31 миллиард утла теҥге. Тыге шушаш ийлан бюджет дефицитдыме лиеш, а ончыкылык жаплан- профицитан. Але парыш ужашыже роскот деч кугурак лийшаш. Стратегий планирований, ялысе туныктымо тӧнежлаште пашам ыштыше- влаклан социал полышым пуымо, тулык йоча- влаклан илыме верым ситарыме, алкоголизм да наркоманийым шижтарыме шотышто закон- влакым федерал закон дене келыштарыме. Тыгак «Ял озанлыклан кугыжаныш полышым пуымо нерген» да «Марий Эл Кугыжаныш Погын нерген» законлашке вашталтышым пуртымо. Сессийын повесткышкыже эше кок у законым пуртымо ыле. Тиде «Йошкар-Ола йыр чодыра полосам шындыме нерген» да «Южо категорий еҥ- влакын погышт, парышышт да роскотышт нерген уверым пуымо шотышто йодышым виктарымаш нерген» закон- влак. Нунымат пенгыдемдыме. Тиддеч посна марий парламент эше ик кӱлешан йодышым рашемден. Республикым вуйлатышын темлымыж почеш, Марий Элыште айдемын праваже шотышто уполномоченныйлан, шолып йӱклымӧ почеш, Фанис Мухаметгалиевым пеҥгыдемдыме. Тудо товатлыме мутым ойлен да должностьшым шукташ тӱҥалын. Фанис Харисович 1977-ше ийыште Параньга районышто шочын. 17 ий утла прокуратура органлаште пашам ыштен.

Прошлые выпуски