Марий Элысе Росгвардийын эн виян спортсменже- влак Уфашке каят
Марий Элысе Росгвардийын эн виян спортсменже- влак Уфашке каят. Марий Элысе Росгвардийын виктемыштыже военно-спорт многоборье дене таҥасымаш- влак эртеныт. Эн уста лӱм верч СОБР-ын, ОМОН-ын да вневедомственный охранын 19 еҥже кучедалын. Нуно шке вийыштым Макаровын пистолетше гыч лӱйкалымаште, иймаште, 10 меҥгыш ече дене таҥасымаште ончыктеныт. Таҥасымашын лектышыже почеш команде- влак коклаште сеҥышыш ОМОН-ын командыже лектын. СОБР-ын спортсменже- влак ший медальым налыныт, вневедомственный охранын еҥже- влак кумшо верыш лектыныт. Личный зачётышто икымше верым ОМОН-ын еҥже налын, кокымшыш СОБР-ын, кумшыш ОМО-нын еҥже лектыныт. Ынде эн талыже- влак сборный командыш пурат да Росгвардийын верысе виктемжын чапшым Юл кундем округын Чемпионатыштыже, 10-14-ше февральыште Уфа олаште аралаш тӱналыт.
