Марий Эл гыч кок бренд «Российын тамже- влак» конкурсышто лу эн сай радамыш пурен
Марий Эл гыч кок бренд «Российын тамже- влак» конкурсышто лу эн сай радамыш пурен. Российын ял озанлык министерствыже кочкыш сатун регионласе брендыштын икымше калыкле конкурсын лектышыжым иктешлен. Эн сай лу сату радамыш Марий Эл гычат ойыртемалтше кочкыш- влак пуреныт. Сеҥыше- влакым кандаш номинацийыште ойыреныт. «Тамлен ончо, келша» номинацийыште Йошкар-Оласе шыл комбинатын марий подкогыльыжо, «Уло эл мучко» номинацийыште «Шернур легенда» сыр палемдалтыныт. Республикысе ял озанлык министерствыште умылтарыме почеш, лектыш почеш регионласе бренд- влакын каталогыштым ыштат. Шушаш ийын тыгай конкурсым уэш эртараш шонат. Мемнан республике тиде конкурсыш чулымын ушнен да 15 брендым таҥасаш колтен ыле. Икымше конкурсыш чылаже 79 кундем гыч 500 утла брендым колтымо ыле.
