Марий Эл Кугыжаныш Погынын латикымше сессийже лийын

Марий Эл Кугыжаныш Погынын латикымше сессийже лийын
              Марий Эл Кугыжаныш Погынын латикымше сессийже лийын. Тудын пашаштыже сенатор Сергей Мартынов, тӱҥ федерал инспектор Сергей Беляков, Правительствын еҥже- влак, министр-шамыч да моло вуйлатыше- влак лийыныт. Парламент верысе самоуправлений шотышто республикысе у законым приниматлен. Тудо верысе самоуправленийым ик уровенян системыш кусарымашым да муниципал образованийым вуйлатышым сайлыме радамым пеҥгыдемден. Ынде тиде должностьыш кандидат- влакым ончыч республикым вуйлатыше акла, вара муниципал образованийын представительный органышкыже решенийым лукташ пуа.
             Кум законодательный акт дене «Республикыште административный правонарушений нерген» законыш вашталтышым пуртымо. Оза- влак пий ден пырысыштым 15 кече жапыште огыт регистрироватле гын, кок тӱжем теҥге марте штрафым тӱлыктен кертыт. Тыгак тӱрлӧ вере возгалымылан, сӱретлымылан, увертарымашым, плакатым да молымат пижыктылмылан штрафым кугемдыме. Йошкар-Ола администрацийлан йӱшӧ, наркотик але моло вещества дене аҥыргыше- влаклан полышым ышташ полномочийым пуымо. Тыге рӱдӧ олаште айныктарыме вер лийшаш. Ондак айныктарыме верым Волжскышто почыныт ыле.
            Сессийыште икымняр законым федерал закон дене келшышым ыштеныт. Тыгак У Торъял районышто Шӱргыялым Токтарсола деке, Плешивцы ялым Масканур села деке ушымо. Сессийыште чылаже Республикын 14 законжым да Кугыжаныш Погынын 18 пунчалжым приниматлыме.
             Фото: Марий Эл Кугыжаныш Погынын пресс-службыжо.

Прошлые выпуски