Марий Элысе тазалыкаралтышыште врач ситыдымаш да кадрын кугу ийготыш шумыжо палдырна

Марий Элысе тазалыкаралтышыште врач ситыдымаш да кадрын кугу ийготыш шумыжо палдырна
           Марий Элысе тазалыкаралтыш врач ситыдымаш да кадрын кугу ийготыш шумыжо дене тӱкнен. Кугыжаныш погынын социал политике комитетшын ӧрдыжтӧ эртарыме заседанийже Медицина колледжыште эртен да республикысе тазалыкаралтышын кадр проблемыжым радамын каҥашымашке савырнен. Парламентарий- влак эмлыме вер- влаклан кузе кадрым ситарыме, самырык тукымым кучен кодымо, цифран технологийым кадр службылан полшаш ушымо йодыш- влаклан вашмутым кычалыныт.
          Мутланымашлан амалжат кугу лийын. Апрельыште Йошкар-Ола Юл кундем округысо чыла кундем гыч коллегыже- влакым вашлиеш. Тушто медицина пашаеҥ- влакын ситыдымышт  тӱҥ темыш савырна.
          Тазалыкаралтыш министр Владимир Гладнев палемден: ик велым пашадарым нӧлталме да яллашке фельдшер- влакым ситарыме. Вес велым эмлыме вер- влаклан 247 врач, поснак акушер-гинеколог ден терапевт- влак да 345 медшӱжар огыт сите. Медшӱжар коклаште кугу ийготан еҥ- влак шукын пашам ыштат, кажне луымшо пашаеҥже 60 ийым эртен, а самырык- влак пешыже толаш огыт шоно.
           Марий университетын представительже- влак куд системный ситыдымашым палемденыт. Тӱҥжӧ: теорий ден практикын ушнен шогыдымышт- студент- влакым эмлыме верлаште у оборудований деке огыт пурто, врач- влакын самырык-шамычым туныкташ стимулышт уке, наставничество шке кумылым ончыктымаште гына кучалтеш, теҥгечысе школьник- влакын ял илышлан ямде огыл улмышт шижалтеш.
          Ойлышо- влакын мутышт почеш, полышым медицина пашаеҥын «цифран кышажым» ыштымаш лийын кертеш. Ик базым ыштыман- тудо специалистын пӱрымашыжым школ гыч тӱналын пенсийыш лекмешкыже эскераш тӱҥалеш. Тиде вуз ден тазалыкралтыш коклаште мыняр выпускник налме профессий дене пашам ыштыме шотышто ӱчашымашым чараш полша. Тиддеч посна тений гыч медицине колледж негызеш регионысо кадр рӱдер ышташ тӱналеш. Тудо профориентаций пашам шукта да специалист- влакым эмлыме вер- влакын заказышт почеш ямдылаш тӱҥалеш.
            Фото: Марий Эл Кугыжаныш Погын.

Прошлые выпуски