Марий-влак нерген - Москосо метрошто
Москвасе метрошто марий кундемлан пӧлеклалтше фотоончерым почмо. Тудо «Марий-влак Российын кумдыкыштыжо» маналтеш. Республикын 100 ияш лӱмгечыжлан пӧлеклалтше ончер Марий Эл правительствын да Москосо метрополитенын иквереш ыштыме пашашт. Республикым вуйлатыше Александр Евстиффев тудым сайлан шотлен. Проектын авторжо – фотожурналист Денис Речкин. Тудо тӱрлӧ кундемыште илыше марий-влак нерген палдарыше 43 пашам чумырен. Фото-влак калыкнан акрет годсек аралалтше йӱлаже, поян тӱвыраже, вургемже ден кочкышыжо, пайремже-влак нерген ойлат.
Ончер «Выставочный» лӱман станцийыште 2 арня пашам ышташ тӱналеш.
