Мемнан самырык шахматистна кум эн тале радамыш логалын
Марий Эл гыч самырык шахматист кум эн тале радамыш логалын. Республикыштына шахматын тӱнямбал кечыжлан пӧлеклалтше онлайн-турнир эртен. Мероприятийыш элысе тӱрлӧ кундем да йот эл гычат 59 участник ушнен. Таҥасыше- влак виян лийыныт, сандене икымше вич вер верч кучедалмаш пытартыш минут марте шуйнен. Икымше минут гычак самырык чемпион, Марий Эл гыч спорт мастерыш кандидат Максим Волков шкенжым чолган ончыктен. Икымше йӧндымо матч деч вара, Максим моло шым вашлиймашыште сеҥышыш лектын, моло- влак деч сайынак ойырлен, лидерыш савырнен. Но эше индеш партийыште изиш мӧҥгештын. Тыге моло- влак тудым поктен шуыныт да кучедалмаш эшеат пӱсештын. Шагатат пеле наре кучедалме деч вара турнирыште 49 очко дене сеҥышыш ФИДЕ-н мастерже Татарстан гыч Роберт Сафин лектын. Кокымшо верыште 47 очко дене Максим Волков лийын. Кумшо верым 44 очко дене Татарстан гыч Артём Нагимов налын. Нылымше ден виымше верыш Чебоксар гыч Антон Смирнов ден Узбекистан гыч спорт мастерыш кандидат Акбарали Абдухакимов лектыныт.
