Мишканыште шанче-практик конференций лиеш

Пошкырт кундемысе Мишкан селаште, финн-угор тӱнян тӱвыра рӱдыверыштыже. 27-ше мартыште «Йылме, йӱла, тӱвыра- марий калыкын поянлык негызше» регион- влак кокласе шанче-практик конференций лиеш. Тудо ныл секций дене пашам ышта: марий йӱла, марий йылме, эрвел марий- влакын мер илышышт, марий тӱвыра да йӱла. Тушко ушнаш йодмашым 15-ше март марте налыт.
              А 16-шо июньышто Эстонийысе Тарту олаште «Финн-угор тӱнян 2021-ше ийысе тӱвыра рӱдолаже» лӱмым палемдышаш верч конкурс лиеш. Сеҥышым финн- угор калык- влакын 8-ше тӱнямбал конгрессышт эртыме годым 19-ше июньышто увертарат. 30-шо апрель марте конкурсыш йодмашым чыла финн-угор кундем гыч ял, ола- влак пуэн кертыт. Тушко лач кугыжаныш да регионласе рӱдӧ ола-влак огыт пурталт. Кум финалистым 11-ше майыштак увертарыме лиеш. Ушештарена: тиде лӱмым кодшо ийын Морко велысе Унчо села нумалын, тений Пошкырт элысе Мишкан марий села тиде лӱм дене кугешна.

Прошлые выпуски