Юрино калык врач ситыдымылан вуйым шиеш

Юрино районышто кок врач пашам ышта- педиатр ден гинеколог. Марий Эл деч Кугыжаныш Думын депутатше Сергей Казанковын мер приёмныйышкыжо Юрино районышто илыше- влак серышым колтеныт. Тыгаяк серышым элын Президентшыланат возеныт. Серыш йымалан тӱжемат 700 утла еҥ кидпалыжым пыштен. Тидыже районысо кугыеҥын ик кумшо ужашыже наре лиеш. Чыла рашемдаш манын, парламентарий районышко миен да калык дене вашлийын. Тушто кугу проблема медицине дене кылдалтын. Мутлан стоматологий поликлинке кодшо курым тӱҥалтышыште чоҥымо пӧртыштӧ верланен. Канализацийже уке. Рӱдӧ эмлыме верат 1905-ше ийыште чоҥымо пӧртыштӧ пашам ышта. Верысе калыкын мутшо почеш, кок специалист пашам ышта- педиатр ден гинеколог. Тудак анестезиолог, УЗИ-н врачше, арняш кум гана терапевт пашам ышта. Моло кечынже терапевт деке Козьмодемьянск олаш кошташ кӱлеш. Тушко 100 меҥге лиеш. Адакшым Юл гоч паром дене вончыман, а шошым да шыжым- 5 тылзе наре жап, ий пеҥгыдеммым да шулымым вучыман. Вашке полыш ик велыш гына наҥгая– Козьмодемьянск эмлыме верыш. Депутат тиде йодышым Россий правительствыште проект комитетын заседанийыштыже нӧлталаш сӧрен.

Прошлые выпуски