Тений республикысе ял озанлык сатум ыштен лукшо- влак шке сатуштым йот эллаш шукырак колташ шонат

Тений республикысе ял озанлык сатум ыштен лукшо- влак шке сатуштым йот эллаш шукырак колташ да географийым кумдаҥдаш шонат. «АПК продукцийым экспортыш колтымаш» федерал проектым кузе шуктымо йодыш дене Российын ял озанлык министрже Дмитрий Патрушев теҥгече видеоконференций йӧн дене совещанийым эртарен. Мутланымаште  ял озанлык ведомство да предприятийлан озашт дене пырля республикым вуйлатыше Александр Евстифеев участвоватлен. Патрушевын мутшо почеш федерал проект почеш йотэлыш ужалыме кугытым ешарыме шотышто планым пеҥгыдемдыме. Тенийлан 25 миллиард доллараш сатум колташ палемдыме гын, 2025-ше ийлан тудо 45 миллиард долларыш шушаш. Марий Эл АПК сатум экспортыш кодшо ийын  9 миллионат 500 тӱжем долларлан 25 элыш колтен. Тӱҥ партнёр- влак Узбекистан, Белоруссий, Таджикистан да Италий улыт. Республикысе ял озанлык да промышленность министерствын тыршымыштлан кӧра, географий кумдаҥеш. Китайыш сурткайык шылым, Украиныш сырам, Казахстаныш кондитер сатум колташ тӱҥалме. Республикысе агропромыш сатужым Российысе кундем- влакат куанен налыт. Республике деч ӧрдыжтӧ шкенан сатум ужалкалыме 908 объект уло. Марий Элын сатужо брендыш савырнен.

Прошлые выпуски