Ныл самырык еҥын кум кило наре кыне шудыштым поген налыныт
Советский районышто ныл самырык еҥын кум кило наре кыне шудыштым поген налыныт. Советский районын прокуратурыжо нунын шотышто уголовный паша почеш титаклымашым пеҥгыдемден. Нуным наркотикан кушкылын ужашыжым шаркалымылан титаклат. 18-19 ияш самырык еҥ-влакым августышто районысо ик ял кундемыште кученыт. Нунын пеленышт мешак ден пактелаш оптымо кӱрын налын коштымо кыневондо лийын. Чылаже кум килограмм марте шуын. Полиций пашаеҥ- влакым ужмеке, кушкылыштым кудалтен шылаш тыршеныт. Иктыже пасушто шылын, кокытшо корно дене посёлко марте куржыныт. Но шылын куржын кертын огытыл. Уголовный пашам Советский районысо судыш колтымо. Нуным лу ий марте эрык деч посна коден кертыт, - увертара Марий Элын прокуратурыжо.
