Республикыште осал паша моло кундемла деч шагарлак ышталтеш, - каласен Юрий Зайцев
Республикыштына осал пашан кӱкшытшӧ Юл кундем округ да Россий Федераций мучко кокла шот дене ончымаште икмыняр ий почела ятырлан шагалрак кучалтеш,- каласен Юрий Зайцев. Теҥгече тудо Эл кӧргӧ паша органын пашаеҥжын кечыже лӱмеш торжественный погынымашыште участвоватлен. Тудын мутшо почеш республикыште правам аралыме корно дене икмыняр кугыжаныш программе шыҥдаралтеш. Утларак сай лектыш дене корно лӱдыкшыдымылык паша шукталтеш, «Лӱдыкшыдымӧ ола» аппаратно- программный комплекс дене видеоэскерыме сеть кумдаҥеш. Республикым вуйлатыше ветеран- влакын пашаштым поснак палемден. Служебный порысым шуктымо годым вуйым пыштыше полиций сотрудник- влакым ик тат шып шоген шарналтеныт. «Марий Эл ончылно надырлан» орденын медальжым МВД министрын алмаштышыже Алексей Коноваловлан кучыктымо. Икмыняр сотрудникым Правительствын Чап Грамотыжо ден Республикым вуйлатышын тауштымашыже дене палемдыме. Ведомствын наградыже- влакым Республикысе эл кӧргӧ паша министр Андрей Вырвич кучыктен. Полномочный представитель Игорь Комаровын кӱштымыжӧ почеш личный составым Тӱҥ федерал инспектор Павел Волков саламлен.
Фото: Марий Элым вуйлатышын организаций да аналитик виктемже.
Фото: Марий Элым вуйлатышын организаций да аналитик виктемже.
