«Ончыко» журналын 100 ияш лӱмгечыжлан сылнымут конкурсым ыштыме
Марий Элыште «Ончыко» журналын 100 ияш лӱмгечыжлан марий йылме дене проза произведенийлан сылнымут конкурсым ыштыме. «У вий»- «Ончыко»: 100 ий» конкурсым тӱвыра министерстве увертарен. Положенийым ведомствын официальный сайтыштыже вераҥдыме. Тудын дене келшышын конкурсыш марла возышо 18 ияш деч кугурак автор- влак ӱжалтыт. Конкурсыш ондак савыкталтдыме роман ден повесть- влакым налыт. Моло таҥасымашыште сеҥышыш лекше произведений- влак огыт ончалт. Произведенийым электрон але печатлыме йӧн дене пуыман. Йодмашым икымше июль марте налыт. Тудым редакцийыш Панфилов уремысе 39-ше пӧртыш намийыман але электрон почтыш колтыман. Адресше: марийымал корешжурналсобакамайл.ру. Иктешлымаш икымше октябрь марте ышталтеш. Конкурсын приз фондшо- 100 тӱжем теҥге. Икымше верлан 40 тӱжем теҥге, кокымшылан- 30, кумшылан 20 тӱжем теҥге. Тыгак кумылаҥдыше кок премий вич тӱжем теҥге дене лиеш,- воза «Кидшер» сайт.
Фото: Иван Николаев / Кидшер
Фото: Иван Николаев / Кидшер
