Республикым куандарыше спорт сеҥымаш- влак вучат манын ӱшанем,- каласен Марий Элым вуйлатыше
Теҥгече Марий Элым вуйлатыше Александр Евстифеев республикысе паралимпий резерв адаптивный спорт школыш миен. Тудо «Спартак» ФОК-ышто верланыше школын спортсменже- влакын ямдылалтме йӧныштым ончен. Тренер пӧлемым, кабинетлам, спортзалым терген, тренер- влак да нунын воспитанникышт дене мутланен. Тиде спортшколын пашам ыштыме ойыртемже нерген спорт-туризм министр Лидия Батюкова, школын директоржо Кирилл Печенин ойленыт. Глава голбол, боччи дене модмо да куштымо заллашке пурен. Лач тиде жапыште тренировке каен, коляске дене коштшо- влак спорт куштымашым тунемыныт. А кугу залыште баскетболист да начар ужшо- влакын футбол командыже модыныт. Мутланымаште начар тазалыкан- влаклан спортын ончыкылыкшо нерген мут лектын. 2012-шо ийыште почмо школлан кӧра тыгай спортсмен- влаклан ямдылалтме йӧн кумдаҥын. Школышто ончыч мини-футбол, дзюдо, пауэрлифтинг дене гына шуаралтыныт гын, кызыт эше иймаш, куштымаш, куштылго атлетике, теннис ешаралтын. Шушаш ий гыч ӱстембал теннис дене пӧлка почылтшаш. Спорт дене кылым кучышо- влакат ешаралтыныт. 2015-ше ий гыч кок пачаш шукемын. Поснак кеҥежымсе спартакиада шӱкалтышым ыштен. Александр Евстифеев иктешлышыла каласен: спорт комплекс уда огыл. Республикыште ме паралимпий толкыныш пурышо спортын чыла видшымат вияҥдышаш улына. Мемнан ончыкылык паралимпиецна- влак йӧнан жапыште, йӧнан верыште, чапле тренер полыш дене шуаралтшаш улыт. Республикым куандарыше спорт сеҥымаш- влак вучат манын ӱшанем,- палемден тудо.
