Республикыште кушкылым ончен-куштымо тенийсе пашалан иктешлымашым ыштыме
Ял озанлык министерствыште ял озанлык культурын урлыкшым тергыме шотышто совещаний эртен. Тушто Республикысе ял озанлык министрын алмаштышыже Андрей Кондратенко кушкылым ончен-куштымо тенийсе пашалан иктешлымашым ыштен. Марий Элыште тений 240 тӱжем тонн утла пырчым шийын налме. Кокла лектыш ик гектарлан шотлымаште 20 центнер утла лийын. Тыгак пареҥгым 52 тӱжем тонным погымо. Ик гектар гыч 220 центнер дене налме, 49 тӱжем тонн пакса- саскам ончен куштымо. Вольыкым пукшаш нӧрӧ да чоштыра кормам ситышын шапашлыме. Госсорткомиссийын филиалже гыч специалистын ойлымыж почеш идалык мучко Марий Элыште урлыкым тергыме куд участкыште 642 сортоопытым эртарыме. Тушто 28 культурын 302 урлыкшым тергыме. Тудын лектышыже почеш элысе да йот элысе селекцийын 15 урлык да гибридшым мемнан кундемлан келыштараш темлыме. Тиде кокияш уржа, третикале, икияш шӱльӧ, пурса, люцерна, пареҥге, ковышта, кешыр, сакырушмен улыт. Сай лектышан урлык-влакым районироватлымаш пырчым да пареҥгым, кургым шукырак налаш йӧным ышта.
