Республикыштына «Йоча- влакын лӱдыкшыдымылыкышт шотышто» месячник эрта
Республикыштына «Йоча- влакын лӱдыкшыдымылыкышт шотышто» месячник эрта. Тудым граждан оборона да калыкым аралыше комитет эртара. Тудын цельже- йоча- влакым лӱдыкшӧ деч посна илаш, корно ден транспортышто шкем кузе кучаш, вӱдыштӧ, чодыраште да мӧҥгыштат тӱтко лияш туныктымаш. Тылзе жапыште йочан тул дене модмыжым, вӱдыштӧ лийын кертше лӱдыкшым шижтараш манын умылтарыме паша эртаралтеш. Черлан кӧра шуко жап дистанционно пашам ыштымеке, пожар ваштареш кучедалше службо илыме верлашке, шуко шочшан еш- влак деке лектын кошташ тӱҥалын. Калык дене мутланыме деч посна пожар лӱдыкшӧ нерген листовкым да шарныктарыше кагазым шаркалат. Вӱд воктене да йӱштылмӧ годым шкем кузе кучаш, чарыме верлаште йӱштылмын эҥгекше нерген ушештарат.
