Икымше сентябрьыште поро йӱлаш савырныше школ линейка лиеш
Икымше сентябрьыште икымше классыш толшо- влакым поро йӱлаш савырныше школ линейка вуча. Российысе школ- влак у тунемме ийым молгунамсе семынак очно тӱҥалыт. Тидын нерген Российын просвещений министрже Сергей Кравцов теҥгече брифингыште увертарен. Министерстве у тунемме ийлан да линейкым эртараш кызытак ямдылалташ тӱҥалын. Министр рашемден: ме классический туныктымо формо нерген ойлена. Дистанций гыч туныктымашым пурташ огына шоно. Дистанций гыч туныктымашын шуко сай могыржо уло гынат, тудо классический формо деке ешартыш семын гына ончалтеш.
