Республикышкына йӱштӧ игече толын

           Республикышкына йӱштӧ игече толын. Кызыт Урал ӱмбалне куатле антициклон верланен. Тудо республикыштына арня мучаш марте лумдымо йӱштӧ игечым куча. Южын кокла температурыжо климат нормо деч 6-9 градуслан йӱштырак лиеш. Йӱдым оярлан кӧра  18- 23 градус марте йӱкшемда, кечывалым 10-15 градус лиеш. Мардеж кечывалвел- эрвелым секундышто 5 гыч 10 метр марте писылык дене пуа. Йырюжын темдыме куатше нормо деч кугу- 770-774 миллиметр марте кӱза. Йӱштӧ игече вес арнянат аралалт кодеш.
            Декбрьыште эн йӱштӧ игече 1978-ше ийын 31-ше декабрьыште лийын. Тунам термометр 46 градусым ончыктен. Тылзын икымше декадыштыже эн йӱштӧ 1955-ше ий 6-7-ше декабрьыште палемдалтын- 35-36 градус. Пытартыш 20 ийыште йӱштӧ декабрь 6 гана лийын: 2016-шо, 2012, 2010, 2009, 2002, 2001-ше ийлаште. Россий Гидрометцентрын ончыктымыж почеш теле тичмаш налмаште леве лийшаш. Декабрь ден январь нормо дене келшен толыт, февраль- март – левырак.

Прошлые выпуски