Республикыштына чодырам тул деч аралаш техникым наледат

Республикыштына чодырам тул деч аралаш техникым наледат
             Республикыштына чодырам тул деч аралаш техникым наледат. Чодыра пожар станцийлам технике дене пойдарымаш «Экологий» калыкле проектын «Чодырам аралымаш» регионысо проектшым илышыш шыҥдарыме кышкарыште шукталтеш. Федерал бюджет гыч тиде пашалан 38 миллионат 800 тӱжем теҥгем ойырымо.
             Тиде шийвундо дене кум пожар, ныл грузовой машинам, бензопилам да южым тулышо оборудованийым  налаш палемдыме. Тиддеч посна Республикын резерв фондшо гыч 8 чодыра пожар станцийым  тул йӧртымӧ оборудований, снаряжений да инвентарь дене укомплектоватлаш 29 миллионат 200 тӱжем теҥгем кусарыме. Тиде окса дене кӱкшӧ давлениян 19 установкым, 14 мотопомпым, шым тӱжем метр утла пожар рукавам, пилотде чоҥешылше 11 аппаратым, 56 радиостанцийым, вӱдлан да йӱлышӧ ден шӱрымӧ материаллан 100 емкостьым налме. Тидын нерген республикым вуйлатыше Юрий Зайцевлан пӱртӱс поянлык министр Алексей Киселёв каласкален.
            Кодшо ийысе шошо- кеҥеж жапысе тул пижме лӱдышӧ тургымын лектышыже нерген МЧС тӱҥ виктемым вуйлатыше Виктор Шангин ойлен. Республикыште кодшо ийын тӱжемт 170 пожар лийын. Тушечын 221 ганаже кукшо шудо йӱлен. Пӱртӱс пожарын тӱҥ амалже семын айдемын титкше кодеш. Кодшо ийын кукшо шудым йӱлалтымылан 71 протоколым возымо. Шуко ий эскерыме почеш тул пижме лӱдыкшо апрельын кокымшо-кумшо декадыштыже тӱҥалеш. Эн лӱдыкшӧ жаплан май ден август шотлалтыт.
              Юрий Зайцев тул лӱдыкшӧ жаплан ямдылалтмашым республике ончылно шогышо ик эн тӱҥ задачылан шотла. Сандене автопаркым уэмдымаш кӱлешан мерылан шотлалтеш. Тудлан кӧра чодыра тул ваштареш кучедалмаш лектышан лиеш.
             Фото: Марий Элым вуйлатышын  администрацийжын увер дене пашам ыштыше пӧлкаже.

Прошлые выпуски