Рӱдолаште пу леваш- тошто илышын сӱретше
Йошкар-Оласе кудывечыла гыч тоштемше пу сарай-влакым кораҥдыме сомыл умбакыже шуйна. Рӱдолам нуно йӧршынак огыт сӧрастаре. Тиде пашам аклаш манын, Йошкар-Ола администрацийын муниципал погым виктарыме шотышто комитетшым вуйлатыше ден ола погынын депутатше ола мучко коштын савырненыт. Нунын мутышт почеш, ондак оласе южо пӧртым коҥга дене ырыктеныт. Сандене олтышаш пуым аралаш тыгай пу леваш- влакым чоҥеныт. Южо вере еҥ- влак тыгай левашым шкевуя ыштеныт. Кызыт ынде шукыжо кӱлдымыш лектын, озадыме улыт. Кудывечым тӱзаташ чаракым ыштат, шукыж годым лач тушто тул ылыжеш, тӱрлӧ тӱшка еҥ- влак погынат. Кызыт тыгайжым рашемдат да рончен кораҥдат. Тыгай паша Клара Цеткин, Советский, Складской уремлаште шукталтеш. Сарай- влакым кид дене рончат, ярсыше верыш рокым оптат да тӧрлен шындат. Идалык мучаш марте эше куд кудывечыште тыгай левашым кораҥдаш палемдыме.
