Санкций жапыште Марий Элысе ик эн кугу предприятийын паша лектышыже 15 процентлан кушкын
Санкций жапыште Марий Элысе ик эн кугу предприятийын паша лектышыже 15 процентлан кушкын. Январь гыч август марте Красногорскысо автомобиль фургон комбинат ныл миллиард теҥгелан шке лукмо сатужым колтен да паша ден полышым ыштен. Тидыже 2022-шо ийысе тагаяк жаплан шотлымаште 114 наре процент лиеш. Тений предприятий промышленный продукцийым чылаже куд миллиардат 500 миллион теҥгелан колташ шона. Производствым пужен ышташ да уэмдаш 45 миллион утла теҥгем колтымо лиеш. Тыгай лектыш дене комбинат шкенжын 95 ияш лӱмгечыже деке лишемын. Предприятийым да пашаче коллективым да ветеран- влакым саламлаш Марий Элым вуйлатыше Юрий Зайцев миен. Тудо ӱшаным каласен: тыгай пашам йӧратыше да икоян коллективлан кӧра предприятий производство кугытым ешарен толеш. Предприятийын образецше- влак техник характеристике дене импортын тагяк сатужо деч ятырлан кӱшнырак шогат. Молан манаш гын, «КАФ»- ын кӱлеш ресурсшо, специалистше ситышын уло. Нуно шкеныштын ойыртемалтше, рынкыште йодмаш дене пайдаланыше продукцийым луктын моштат. Юрий Зайцев мучашлан Республикым вуйлатышын тауштымашан серышыжым генеральный директор Николай Ураевлан, токарь Анатолий Ершовлан, цехын кугурак мастерже Людмила Ивановалан да склейщик Валентина Калеевалан кучыктен.
Фото: Марий Элым вуйлатышын администрацийжын увер дене пашам ыштыше пӧлкаже.
Фото: Марий Элым вуйлатышын администрацийжын увер дене пашам ыштыше пӧлкаже.
