Шернур посёлкышто у кинозал пашам ышташ тӱналын
Шернур посёлкышто у кинозал пашам ышташ тӱналын. Объект «Тӱвыра» калыкле проект почеш ышталтын. Качестван сӱрет да йӱк лийже манын у киноэкраным, 3Д проекцийлан оборудованийым, акустике системым да моло техник келыштарымашым налме. Зал 30 еҥлан келыштаралтын, коляскан- инвалид- влаклан кок верым йӧнештарыме. Кинозаллан «Легенда» лӱмым поэт, актёр, икымше йӱкан «Путёвка в жизнь» киношто модшо Йыван Кырля лӱмеш пуымо. Тыгак лӱм моло событий денат кылдалтын. Тиде- Виктор Цой, тудын лӱмеш посёлкысо ик уремыште арт-объектым ыштыме, тыгак Марий Йӱштӧ кугыза нерген легенде, «Шернур легенда» сыр да молымат шотыш налме,- каласен район администрацийым вуйлатыше Александр Кугергин. Калыкле проект кышкарыште республикыштына кином ончыктымо 9 кинозалым почмо. Объект- влак йодмаш дене пайдаланат,- палемден Правительстве вуйлатышын алмаштышыже, тӱвыра министр Константин Иванов.
Фото: Тӱвыра министерстве.
Фото: Тӱвыра министерстве.
