Социал полыш пакетым тичмаш кодаш але туддеч кораҥаш да оксам ойырен налаш?
Икымше октябрь марте федерал льготник- влаклан соцпакет шотышто шонымашым пеҥгыдемдыман. Социал полыш пакетым тичмаш кодаш але туддеч кораҥаш да оксам ойырен налаш- тиде путырак кӱлешан решений. Тазалыкаралтыш министрын алмаштышыжын мутшо почеш, оксам ойырен налмеке, шарнаш кӱлеш: тазалык кеч-могай жапыштат начарем кертеш. Кужу жап эмлалташ кӱлеш лиеш гын, 863 теҥге окса компенсаций эмлан кучылтмо роскотым петырен ок керт. Федерал льгото дене пайдаланыше еҥ соцпакет деч шоналтыде кораҥеш гын, социал полышым налаш правам уэш тений 1-ше октябрь марте пӧртылтен кертеш. Тидлан Пенсий фондыш йодмашым возыман. Кӧ тений яра эм дене пайдаланен гын, йодмашым пуаш ок кӱл.
