«Стейнвей» рояль республикыште кокыт гына
«Культура» калыкле проект кышкарыште республикысе тӱвыра тӧнеж ден музыкальный школ- влаклан семӱзгарым ситарыме паша умбакыже шуйна. Кодшо кечылаште Палантай лӱмеш тӱвыра да сымыктыш колледжыш кумдан палыме немыч компанийын ямдылыме «Стейнвей» рояльым кондымо. Колледжым вуйлатыше Алексей Паскичевын мутшо почеш, тыгай семӱзгарым налаш 9 миллионат 800 тӱжем теҥгем кучылтмо. Сымыктышым умылышо- влак палат: тиде пеш кугу поянлык. Республикыштына тыгай рояль лач Эрик Сапаев лӱмеш театрыште гына уло. Ушештарена: кодшо ийлаште «Николай Рубинштейн» да «Михаил Глинка» лӱман 18 у фортепианым налме ыле. Тений тиде пашалан 18 миллион теҥге ойыралтеш.
