Таче- икымше сентябрь- шинчымаш кече
Таче- икымше сентябрь- шинчымаш кече. Тиде шарнымашан кече дене тунемше да студент, ача-ава да туныктышо- влакым республикым вуйлатыше Александр Евстифеев саламла. Мыланна кажныланна икымше сентябрь- вургыжтарыше да кӱлешан пайрем. Поснак таче икымше класыш толшо- влак тургыжланат. Нунылан школ илыш тӱҥалеш. Лу тӱжем наре йочалан таче ончыкыкылык, оҥай илышыш корно почылтеш. Тиде тунемме ий Йошкар-Оласе 9-ше В микрорайонышто илыше самырык еҥ- влакланат ойыртемалтше лиеш. Тушто у школ омсажым почын. Тушко тӱжем наре ӱдыр-рвезе толын. Тений чылаже 80 тӱжем наре ӱдыр-рвезе школ омсам почын пурен. Тений шошым туныктымашке куштылго огыл жап тольо. Пандемий жапыште шинчымашым шкевуя пеҥгыдемдаш логалын. Таче те парт коклаш шинчыда, йолташда- влак дене вашлийыда, туныктышын поро шинчаончалтышыжым шижыда. Книгам почшыла шарныза: кугу шинчымашан еҥым сай ончыкылык вуча. Поснак кугу тау шомак туныктышо- влаклан. Чыламат: тунемше да туныктышо- влакымат у тунемме ий тӱҥалме дене саламлем. Усталык кӱкшытым, олимпиаде, конкурс, спорт таҥасымашлаште сеҥымашым, пеҥгыде тазалыкым тыланем, - ойлалтеш республикым вуйлатышын саламлымашыштыже.
