Таче Марий Элым вуйлатыше Юрий Зайцев Марат Хуснуллин эртарыме заседанийыште лийын
Республикыште идалык мучаш марте шуко пачеран кум пӧртым чоҥен пытарыме да аварийный пӧртла гыч 500 утла еҥым кусарыме лиеш. Таче Марий Элым вуйлатыше Юрий Зайцев Российысе регионлам вияҥдыме шотышто Правительстве комиссий Президиумын заседанийыштыже лийын. Тудым элысе правительстве председательын алмаштышыже Марат Хуснуллин эртарен. Тушто корным, илыме верым чоҥымо да моло теме дене кылдатше ятыр йодышым каҥашыме. Марий Элыште «Качестван лӱдыкшыдымӧ корно» калыкле проект кышкарыште тенийсе объект- влаклан 100 процент контрактым ыштыме. Верысе корнылаште шуктымо пашалан тыгак чыла контрактым ыштыме. Шушаш ийланат 59 объект гыч чылаже шотышто ойпидышым кылдыме. 2024-ше ийысе объектла денат идалык мучаш марте чыла контракт ышталтеш. Тений республике кӱкшытан 23 корно объектыште да верысе 19 объектыште, чылаже 185 меҥге кужытышто, 11 кӱварыште пашам мучашлыме. Ялысе кундемлам вияҥдымаш» программе кышкарыште Морко районышто кок корно ужашыште пашам шуктымо да мучашлыме. Тошто илыме фондым кораҥдыме проект почешат пашам шуктымо. 2019-ше 2022-шо ийлан планын 92 процент пашажым шуктымо да кум тӱжемат 559 еҥым кусарыме. Идалык мучаш марте шуко пачеран кум пӧрт чоҥалт шукталтшаш да пашаш колталтшаш. Тушто 561 еҥым кусараш 199 пачерым налаш палемдыме. Тыге палемдыме показатель тӱрыс шукталтеш.
Фото: Марий Элым вуйлатышын организаций да аналитик виктемже.
Фото: Марий Элым вуйлатышын организаций да аналитик виктемже.
