Таче журналист- влак сулен налме наградыштым кидыш кученыт

Таче журналист- влак сулен налме наградыштым кидыш кученыт
        13-шо январьыште Россий печать кече палемдалте. А шке пашашт дене ойыртемалтше да тӱрлӧ конкурслаште сеҥыше- влаклан сулен налме наградыштым таче кучыктымо. Марий Самырык театрыш уло республике гыч журналист, газет ден журналлам савыктымаште тыршыше, тӱшка увер дене палдарыше- влак погыненыт. Куанен палемдыман, журналист конкурсышто сеҥыше- влак коклаште мемнан коллегына- влакат улыт. Мутлан, телевиденийыште эн сай журналист материал номинацийыште Наталья Ямаева, Радиошто эн сай журналист материал номинацийыште Константин Мягчилов ден Людмила Фёдорова палемдалтыныт. «СВОих не бросаем» номинацийыште Маргартиа Соловьева премийым налын. Кугу Сеҥымашлан 80 ий темме лӱмеш увертарыме журналист конкурсышто Алина Кутырева, Наталья Ямаева, Мария Ельмекеева палемдалтыныт. А тиде конкурсынак радиопубликаций номинацийыштыже мемнан радон корреспондентше Наталия Зилотова ойыртемалтын. 
         А Марий Эл Правительствыште Республикым вуйлатыше Юрий Зайцев журналист- влаклан Правительствын премийжым кучыктен. Республикым социал экономик велым вияҥдыме пашам эн сайын ончыктымылан премийым икмыняр номинацийыште пуымо: экономике теме дене «Марий Эл Телерадион» коллективше, ял озанлык дене Килемар районысо «Восход»  газетын ответственный секретарьже Лариса Толстова, социал сферыште Советский районысо «Вестник района» газетын коллективше, тӱвыра илышым ончыктымаште Чыкма ола гыч «Ведомости Козьмы и Дамиана» газетын редакцийже премийын налыныт. Респуьликысе калыкын ойыртемжым ончыктымылан «Марий Эл» газетын редакторжо Светлана Носова, йоча да самырык- влакын прблемыштым почын пуымылан мемнан телевидений гыч Наталья Ямаева палемдалтыныт. А «Марий Элын шӧртньӧ перожо» эн тӱҥ наградым тений «Марий Эл» газетын тӱҥ редакторжо Светлана Пехметова сулен налын. Чыла коллегынам уло кумылын сеҥымашышт дене саламлена.
             Фото: Марий Элым вуйлатышын  администрацийжын увер дене пашам ыштыше пӧлкаже.

Прошлые выпуски