«Тарханово» паркыште экопаркым чоҥаш шонат
Рӱдӧ оласе «Тарханово» паркыште кызытсе жаплан келшыше экопаркым чоҥаш шонат. Эскиз концепцийлан конкурсым увертарыме. Концепцийыш ландшафт, олам чоҥымо, планировка, кумдык да архитектура решений- влак пурышаш улыт. Тиде парк Речной, Спортивный, Дружба уремла коклаште Транспортный ден Молодёжный уремла ушнымаште верлана. Кумдыкшо 12 гектарым айла. Совет жапыште тудо «ВЛКСМ-лан 50 ий темме лӱмеш парк» маналтын, а калык «Тарханово парк» манын лӱмден. Пытартыш 40 ий жапыште тудлан тӱткышым ойырымо огыл, манаш лиеш. Лач футбол стадион семын веле кучылталтеш. Сандене конкурсыш ушнышо- влак тудым тичмаш кузе уэмдышашым шоналтышаш улыт. Конкурсын призовой фондшо ик миллион теҥгем шога. Тудын пелыжым сеҥыше налеш. А вара проект паша тӱҥалеш.
