Приволжский посёлкышто Физкультура да тазалыкым пеҥгыдемдыме комплекс эксплуатацийыш колташ ямде

                       Приволжский посёлкышто Физкультура да тазалыкым пеҥгыдемдыме комплекс эксплуатацийыш колташ ямде. Чоҥымо да монтаж паша- влакым мучашлыме. Тидын нерген Республикым вуйлатыше Александр Евстифеевлан спорт- туризм министр Лидия Батюкова, чоҥымаш министр Михаил Степанов увертареныт. Регионым вуйлатыше у ФОК-ым ончен лектын да ушештарен: тиде спорт сооружений 2012-шо ий годсек кужун чоҥалтшылан шотлалтын, ынде чыла калык тушко коштын кертеш. Документым ыштен пытараш, кадрым ситараш да ситыдыме оборудованийым налаш кодеш. Тиде чапле спорт сооружений, тыгай комплекс республикыште шагал, - палемден республикым вуйлатыше. Кодшо ийын Газпром дене у соглашенийым пеҥгыдемдыме да чоҥен пытараш оксам ойыраш кутырен келшыме. Тиде полыш деч посна ыштен шукташ ок лий ыле, тау тудлан,- каласен Александр Евстифеев.
                    Тидат рашемын: Приволжский посёлкышто у спорткомплекс пелен хоккей коробкым чоҥымо лиеш. Тыгай решенийым Марий Элым вуйлатыше увертарен да ешарен: спорт комплекс ден хоккей коробка кӱлешан спорт инфраструктурым ыштат да посёлкысо, моло ялласе калыклан спорт дене телымат, кеҥежымат кучашышт йӧным ышта.

Прошлые выпуски