Тулыкеш кодшо ӱдырамашын 11 миллион теҥге оксажым шолыштыныт

Тулыкеш кодшо ӱдырамашын 11 миллион теҥге оксажым шолыштыныт
             Марий Элыште тулыкеш кодшо ӱдырамашын 11 миллион теҥге оксажым шолыштыныт. Шернур округышто полицийыш 37 ияш ӱдырамаш полышым йодын миен да мошенник- влак ондаленыт манын каласен. Тудын мутшо почеш пуйто тудлан финанс полыш да социал обеспечений шотышто пӧлкан пашаеҥже йыҥгыртен да вуйым пыштыше пелашыжлан кугыжаныш выплатын кодшыжым пуышаш улыт манын. Ӱдырамаш ӱшанен да СМС гыч толшо кодым каласен.
              Икмыняр жап гыч пуйто силовой структурын еҥже йыҥгыртен да ӱшандарен кертын: пуйто осалым шонышо- влак «кугыжаныш полыш» порталыште личный кабинетыш пураш йӧным муыныт, экстремист паша дене кылдалтше еҥын счётышкыжо оксам кусараш тӧченыт. Шоя правам аралыше еҥ шижтарен: тиде уверым кок арня  жапыште следствий кайыме кышкарыште,  ӱдырамашлан нимат ынышт ыште манын, иктыланат ойлаш ок лий. Ондалыше-влакын кӱштымышт почеш ӱдырамаш банкысе счётшо гыч кок миллионат 282 тӱжем теҥгем налын да куръерлан пуэн.
              Икмыняр кече гыч йыҥгыртен шогышо аферист- влаклан ӱшанен  сётышто кодшо эше 8 миллионат 749 тӱжем теҥгежым налын вес куръерлан пуэн колтен. Тиддеч вара гына ондалалтмыжым умылен да полицийыш толын. Тичмаш налмаште 11 миллион утла теҥгем йомдарен.
             Правам аралыше- влак вашке рашемденыт: икымше куръерже Татарстаныште илыше 18 ияш кок рвезе лийыныт. Нуным кудалыштме машинашт гыч пален налыныт ла кученыт. Мутышт почеш, нуно пашам кычалыныт да палымыштын Марий Элыш ик адрес дене миен ӱдырамаш деч оксам налын толаш темлымыже дене келшеныт. Нунылан 15 тӱжем теҥгем сӧреныт. Кугу оксам палымыштлан пуэныт. Тудыжын кызыт кушто улмыжым рашемдат,- увертара МВД. Уголовный пашам тарватыме.
             Фото: Марий Элысе МВД-н видеожо гыч скрин.

Прошлые выпуски