Давид Родионов кугу таҥасымашла гыч кум шӧртньӧ медальым конден
Марий Эл гыч Давид Родионов кугу таҥасымашла гыч кум шӧртньӧ медальым конден. Саратов областьыште байдарке да каноэ дене куэн иймаште Юл кундем федерал округын Чемпионат ден Первенствыже эртеныт. Таҥасымаште округысо 11 регион гыч 310 спортсмен ӱчашен. Волжскысо куымо школышто шуаралтше Давид Родионов кӱкшӧ лектышым ончыктен да вигак кум дистанцийыште сеҥыше лийын. тудо тӱжем метрыш шкетын иймаште, да вичшӱдӧ метрыш коктын да нылытын таҥасымаште пьедесталын эн кӱкшӧ тошкалтышышкыже кӱзен. Тиддеч посна Волжскын командыже ныл гана 200 метр дене эстафетыште кокымшо верым налын. Ончылно спортсмен- влакым Россий кӱкшытан таҥасымаш вуча: Озаҥыште Российын первенствыже да Энгельс олаште элысе тунемше- влакын 13-шо кеҥежымсе спартакиадыштын финалже.
Фото: Марий Элысе спорт ямдылалтмаш рӱдер.
Фото: Марий Элысе спорт ямдылалтмаш рӱдер.
