Волжск олаште коллекторым олмыкташ 8 миллион утла теҥге оксам ойырымо
Марий Элым вуйлатыше Волжск олаште коллекторым олмыкташ 8 миллион утла теҥге оксам ойырен. Чапаев уремысе 400 миллиметран шке йогышо канализаций коллектор «Центральный» микрорайон гыч кучылтмо вӱдым йоктарен колта. Но пайдаланыме семын тудын пучшо пеҥгыдылыкшым йомдарен да ик ужашыже, 30 метр кыжытышто, шӱтлен. Сӱмырлышо рок вӱдлан йогаш чаракым ыштен. Кугу лаке Чапаев урем корныштак лийын шинчын. Аварийын икымше кечылаж гычак Республикым вуйлатыше тиде объектым контрольыш налын.
