Волжск гыч кучедалше Ингушетийыште шӧртньӧ медальым сеҥен налын
Волжск гыч кучедалше Ингушетийыште Кеҥежымсе спартакиадыште шӧртньӧ медальым сеҥен налын. Ингушетийыште 16 ияш марте рвезе- влак коклаште греко-рим кучедалмаш дене 13-шо кеҥежымсе спартакиадын кокымшо йыжыҥже эртен. Турнир олимпий чемпион Назир Манкиевлан пӧлеклалтын да элнан 58 регионжо гыч 200 наре спортсменым чумырен. Марий Эл гыч 62 килограмм марте нелытан- влак коклаште Волжск гыч олимпий резерв школын представительже Егор Данилов лийын. Тренерже- Российын сулло тренерже Александр Серяков. Рвезе ӱшанлын шӧртньым налын. Тудо финалыште Чечня гыч Российын да Европын тенийсе сеҥышыжым 6 да 2 счет дене ончылтен. Ынде Егор Россий Спартакиадын финалыштыже Моско оласе Мытищи олаште июль тӱналтышыште кучедалаш тӱналеш.
Фото: Алексей Данилов.
Фото: Алексей Данилов.
