Волжскышто Тумерым ик ийлан ончычрак тӱзландарен шуктат
Волжск олаште Тумерым тӱзландарыме паша ик ийлан ондакырак мучашлалтеш. Тушто паркым уэмдашлан проектно-сметный документацийым ямдылаш подрядчикым рашемдыме. Тиде сомылым Санкт-Петербург гыч «Свод» ушем шукташ тӱҥалеш. Ушештарена: сентябрь тӱҥалтышыште Волжск оласе Тумерым тӱзландарыме шотышто проект Изи олалаште «Йӧнан оласе кумдыкым ыштымаш» конкурсышто сеҥышыш лектын. Проектым шыҥдараш федерал бюджет гыч Волжск олалан 80 миллион наре теҥге оксам ойырымо. Проект документацийым ямдылыше «Свод» компанийын кугу опытшо уло. Тыге жап шотыштат вашталтыш лийын. Эн ончыч пашам кок йыжыҥ дене кок ий жапыште шукташ палемдыме ыле. Ынде проектым 2021-ше ий мучаш марте шуктыман. Сандене проектно-сметный документацийым 1-ше февраль марте ямдылен шуктыман. Лишыл жапыште тушто геодезий паша тӱҥалшаш.
