Йошкар-Ола ден Медведево коклаште магистральым Моско гыч компаний чоҥаш тӱҥалеш
Моско гыч компаний Йошкар-Ола ден Медведево коклаште магистральым чоҥаш тӱҥалеш. Черняков уремыште рекреаций зонын кокымшо ужашыжым Москосо «Регионысо чоҥышо компаний» иземдыме ответственностян обществе чоҥаш келшен. Контрактын акше- 398 миллион утла теҥге. Ушештарена: тиде магистраль урем лийшаш. Тудын рӱдӧ ужашыштыже кумда рекреаций зона лиеш. Тушто тротуар- влак, спорт да йоча площадке- шамыч лийшаш улыт. Тиде ужашын кужытшо 282 метр утла лиеш. Пашам 2025-ше ийын октябрьыште мучашлышаш улыт. Кумшо ужашыже Некрасов урем деч Машиностроитель марте шуйна. Тудым чоҥымо шотышто Кугыжаныш закупко сайтыште конкурсым увертарыме. Тӱҥалтыш акше 592 миллионат 300 тӱжем утла теҥге. Участкын кужытшо 659 метр утла. Тыгаяк кумда рекреаций зона да кок велымат транспорт корно лийшаш. Проект почеш 174 парковко вер, тушечын 15-ше - инвалид- влаклан. Кушшо пушеҥге, автозаправке станций да виш автостоянке кораҥдалтшаш улыт. Молыжо- яра вер.
Фото: ВНД.
Фото: ВНД.
