Юрино районышто колызо изиш гына ий йымак каен огыл
Юрино районышто пӧръеҥ колым кучаш каен да йол йымалныже ий пудырген. Тыге изиш гына вӱд йымаке каен огыл. Тудым шке жапыштыже толын шушо полицийын майоржо утарен. Районысо ик ял гыч пӧръеҥ эрденак Юл эҥерыш колым кучаш толын. Сер деч иктаж 20 метр тораште вераҥын. Кечывалым юж изиш ырен, ий шулымо гай лияш тӱҥалын. Шижде тарванымыже годым пӧръеҥ вӱдыш волаш тӱҥалын, шке лектын кертын огыл. Толашен-толашен ватыжлан йыҥгыртен кертын да мо лиймым каласкален. Тудыжо вигак экстренный службыш йыҥгыртен. Полицийын кугурак участковый уполномоченныйже Александр Абросимов тиде вер деч тораште огыл улмаш. Тудлан дежурный йыҥгыртен. Полицейский колызым ужын. Тудын деке эркын нушкын миен да кидше гыч шупшын луктын. А серыште вашке полыш бригаде вучен шоген. Колызым районысо эмлыме верыш наҥгаеныт, а кастене мӧҥгыжӧ колтеныт.
