Юрий Зайцев «Газпромым» вуйлатыше- влак дене Петербургысо 11-ше Тӱнямбал газ форумышто вашлийын

             Марий Элым вуйлатышын пашажым шуктышо «Газпромым» вуйлатыше- влак дене республикыш газым пуртымо пашан лектышыже да ончыкылыкшо нерген йодышым каҥашен. Петербургысо 11-ше Тӱнямбал газ форум кышкарыште Юрий Зайцев «Газпром» ПАО правлений Председательын алмаштышыже Виталий Маркелов да «Газпром межрегионгаз» ООО-н генеральный директоржо Сергей Густов дене вашлийын. Нуно 2021-ше 2025-ше ийлан республикыш газым пуртымо пашам вияҥдыме программын пунктшо- влакым шуктымо да догазификаций йодышым каҥашеныт. Марий Элыште кок корныжо денат паша графикым ончылтен шукталтеш.
            Мутлан, догазификаций шотышто. 2021-ше ийыште 650 сурт деке пурташ палемдыме гын, 716-ым ыштыме. Тений кум тӱжемат 345 лийшаш. Ныл тӱжемат 61 сурт деке газым кондаш 538 миллион теҥге окса кайышаш. Республикыштына калыклан газым ситарыме кӱкшыт тений икымше январьлан 83 утла процент лийын, Россий мучко показательже- 73. 2025-ше ий марте 260 меҥге кужытан 17 кугу объектым чоҥышаш улыт. Тидыже 58 илемыш газым пурташ да 14 котельныйым газыш кусараш йӧным пуа. Тидлан «Газпром» ныл миллиард теҥге оксам кучылташ палемден. Юрий Зайцев газификаций программым кумдаҥдаш темлен да газым вучышо моло илем- влакымат пурташ кӱлеш манын.
             Каҥашыме ик тӱҥ йодышыжо Килемар ден Юрино районлашке газым пуртымо дене кылдалтын. Тидыже Марий Элым вуйлатышын пашажым шуктышын мутшо почеш регионым социал да экономик велым вияҥдаш сай шӱкалтышым пуа.
             Фото: Марий Элым вуйлатышын организаций да аналитик виктемже.

Прошлые выпуски