Юрий Зайцев Йошкар-Оласе уэмдыме «Пӱнчер» интернат- пӧртым ончен лектын
Юрий Зайцев илалше да инвалид- влаклан Йошкар-Оласе уэмдыме «Пӱнчер» интернат- пӧртым ончен лектын. Кугун пужен ыштыме деч вара тиде тӧнеж илалше да инвалид- влаклан сайын илаш кызытсе жаплан келшыше кумдыкыш савырнен. Тушко Республикым вуйлатыше миен. 2023-шо- 2024-ше ийлаште зданийым пужен ышташ 201 миллион утла теҥге оксам колтымо. Тушечын 197 миллионжо федерал бюджет гыч. Тушто фасадым тӱрысынек уэмдыме, окна ден омса блок- влакым вашталтыме, кӧргӧ пырдыж- влакым сӧрастарыме, инженер сетьым олмыктымо, у лифтым шындыме. Тиддеч посна пӧлемлашке у мебельым, кухньылык да технологий оборудованийым налме. Интернетын холлаштыже каныме зоным ыштыме: бильярд, караоке, шахмат, камин ден аквариум, мини-кафе шочыныт. Икымше пачашыште психологын кабинетше, галокамера, физио кабинет, эмлыше физкультура зал да усталык мастерсткой верланеныт. Юрий Зайцев социал полыш пӧлемлам, кочмо верым ончен, интернатыште илыше- влак дене мутланен. Посна тӱткышым тылыште тыршыше- влак Валентина Царегородцева, Нина Мельникова, Антонина Фофоновалан ойырен. Пагалыме да Сеҥымашке пыштыме надырыштлан тауштымо семын «1941-ше- 1945-ше ийлаште Кугу Ачамланде сарыште сеҥымылан 80 ий» лӱмгече медальым кучыктен. Интернат-пӧрт 160 еҥлан илаш келыштаралтын. Таче кечылан тушто 86 еҥ ила, тушечын 50 еҥже милосердий пӧлкаште.
Фото: Марий Элым вуйлатышын администрацийжын увер дене пашам ыштыше пӧлкаже.
Фото: Марий Элым вуйлатышын администрацийжын увер дене пашам ыштыше пӧлкаже.
