«Марий краевед» клубын заседанийыштыже у савыктыш- влакым презентоватленыт
«Марий краевед» клубын заседанийыштыже у савыктыш- влакым презентоватленыт. Вашлиймаш историк да краевед, Курык марий районын шочшыжо Виссарион Фадеевын 75 ияш лӱмгечыжлан пӧлеклалтын. Клубым вуйлатыше Алексей Клёнов тӱҥалтышыште уна- влаклан у савыктышым ончыктен- «Марий Турек районын биографический энциклопедийже» дене палымым ыштен. Краевед Вера Сорокина тушко районышто шочшо да моло кундемла гыч толын шочмо верым вияҥдымашке кугу надарым пыштыше- влакын лӱмыштым чумырен. Вара туныктымо пашан ветеранже Дина Рычкова вес у книга дене палдарен- Шернур район гыч СВО-н участникшылан пӧлеклалтше савыктыш дене. Прогаммын тӱҥ ужашыштыже Виссарион Фадеев нерген каласкаленыт. Тудын районысо лӱмлӧ еҥ- влак нерген погымо материалже ятыр книга ден статьялан негыз лийыныт. Мутлан, 2022-шо ийыште краевед Иван Шамаев ден писатель Юрий Соловьев «Записки учителя истории» книгам савыктен луктыныт. Тушко Федеевын ойырен налме пашаже- влак пуреныт. Клубын черетан вашлиймашыже апрельыште лиеш,- увертара Чавайн лӱмеш калыкле книгагудо.
Фото: Чавайн лӱмеш калыкле книгагудо.
Фото: Чавайн лӱмеш калыкле книгагудо.
