Эрла Ленинград олам фашист блокаде деч пӱтынек утарыме кече

            Эрла, 27-ше январьыште, Ленинград олам фашист блокаде деч пӱтынек утарыме кече. Оборонно-массовый месячник кышкарыште республикыштына «Лениградын блокадысе киндыже» акций лиеш. Эрла тӱрлӧ вере мероприятий кышкарыште киндым пуэдыме пункт- влак ышталтыт. Тӱҥ акцийже Йошкар-Оласе «Курымашлык тул» мемориал комплекс воктене 12 гыч 13 шагат марте эрта. Республикысе доброволец- влак школын да «Воскресение» кычалше отрядын еҥже- влак калыклан Лениградым утарыме нерген каласкалат. Акцийын тӱҥ шонымашыже- тиде оласе калыкын тыгай ойго дене вашлиймышт  нерген шарнымашым арален кодымаш.Акцийын эн тӱҥ символжо- 125 грамм нелытан кинде шултыш. Блокаде жапыште ик кечылан лач тыгай нормым палемдыме улмаш. Киндыжат кызытсе гай огыл, тӱрлым йӧрыман лийын. Акций кышкарыште арня мучко школлаште Шарнымаш урок- влак эртаралтыт. Тиде блокада 872 кече шуйнен. Тудын тӱҥалмыж годым олаште кум миллион утла еҥ лийын гын, мучаш марте 557 тӱжем утла еҥ гына кодын, миллионат вичшӱдӧ тӱжем еҥже  шужен илымылан да бомбардировкылан кӧра ӱмыр лугыч лийын.

Прошлые выпуски