Идалык тӱналтыш гыч илыме верым чоҥен шуктымаш иктат пеле гана кушкын

            Идалык тӱналтыш гыч илыме верым чоҥен шуктымаш иктат пеле гана кушкын. Тиде показатель дене Марий Эл Российысе 20 ончыл кундем радамыш пурен. Ноябрь кыдаллан шотлымаште 421 тӱжем квадрат метр илыме верым пашаш колтымо. Талукаш планым 110 процентлан шуктымо. Калыкле да федерал проект- влакым шыҥдарыме йодышым элысе регионлам вияҥдыме Правительстко комиссий Президиумын заседанийыштыже каҥашыме. Тудым Россий Правительство председательын алмаштышыже Марат Хуснуллин эртарен. Заседанийын пашаштыже Марий Элым вуйлатыше Юрий Зайцев лийын.
            Тичмаш налмаште регион- влак планым шуктат манын палемден Российын чоҥымаш министрже Ирек файзуллин. Марий Элыште аварийный пӧртла гыч калыкым кусарыме шотыштат сай вашталтыш палдырна. Тачысе кечылан 56 тӱжем квадрат метр тошто пӧртым кораҥдыме, кум тӱжемат 722 еҥым кусарыме. Тидыже 2021-2022-шо ийлан план деч 110 процент лиеш. Республике моло проект денат ончылно улеш. Мутлан, корным чоҥымаш дене элыште кумшо верыште, тыгаяк верым «Юл эҥерым тазаҥдымаш»  проект денат айла. Заседанийыште тыгак инфраструктура проект- влакым шыҥдарыме йодышымат ончымо. Республикыште тыгайже- кумыт. Тиде- Медведвеыште Сеҥымашын 75-ше идалыкше лӱмеш бульвар, Медведево ден Йошкар-Ола коклаште Черняков уремыште бульварым чоҥымаш да аэропортышто пассажир терминалым проектироватлыме да чоҥымо паша. Чылаштыжат палемдыме жап дене келшышын паша шукталтеш.
             Фото: Марий Элым вуйлатышын организаций да аналитик виктемже.

Прошлые выпуски