«Калыкын чонжо» Республикысе Правительствын премийжым кучыктеныт
Марий Элыште калык усталыкым вияҥдымашке надырым пыштымылан «Калыкын чонжо» Республикысе Правительствын премийжым кучыктеныт. Тудым калык усталык коллективлам вуйлатыше, калык кид-паша сымыктыш мастар- влак налыныт. «Калык куштымаш» номинацийыште премийым Юлтехын «Атлантик» эстрада куштымаш калык ансамбльжым вуйлатыше Марина Рыбаклан пуымо. «Калык мурымаш» номинацийыште «Голоса» образцовый вокал студийым вуйлатыше Ирина Шестакова налын. «Тыглай калык тӱвыра» номинацийыште «Райхан» фольклор калык ансамбльым вуйлатыше Равия Мусина палемдалтын. «Калык семӱзгар сем» корно дене премийым «Хазина» татар кӱслезе- влакын ансамбльыштым вуйлатыше Гарай Магсумьяновлан пуымо. «Воштончыш» драма калык коллективын вуйлатышыже Ольга Сергеева «Театр усталык» номинацийыште налын. А «Кидпаша сымыктыш аланыште калык мастар» номинацийыште премийым Унчо этно-тӱвыра комплексын воштыр дене тодшо мастарже Иван Гаврилов сулен налын. Премийын кугытшо лу тӱжем теҥге.
