Икымше вич еш Марий Элым вуйлатышын «Икшывым кӱлеш семын ончымылан» Почётан палыже дене палемдалтын

            Икымше вич еш Марий Элым вуйлатышын «Икшывым кӱлеш семын ончымылан» Почётан палыже дене палемдалтын. Тиде знакым Юрий Зайцев тений ноябрьыште пеҥгыдемден ыле. Теҥгече Правительстве пӧртыштӧ знакым кучыктымо икымше церемоний эртен. Тудо Аван кечыжлан пӧлеклалтын. Республикым вуйлатыше палемден: тиде наградым налше чыла еш тунеммаште, пашаште, спортышто, усталык пашаште, шанчыште але сымыктышыште сеҥымашыш шушо йоча- влакым ончен куштеныт але кызыт ончат. Кажныже мо дене гынат ойыртемалтын. Те шке икшывыдам спорт, сымыктыш деке шӱмаҥден да виктарен колтен кертында. Ме ача-ава- влак палена: йоча чын корно дене кайыже манын, тудым жапыштыже виктарен колтыман.
             Наградым налше- влак коклаште художественный гимнастике дене Российын спорт мастерже Юлия Козлован ешыже. Тудо кум кӱшыл шинчымашым налын, экономике шанче кандидат, Россий кӱкшытан таҥасымашлаште ятыр гана сеҥышыш лектын. Шкенжын кум йочажымат таяк цельыш шуаш тыршышым кушта. Елена ден Эдуард Батаевмыт шкеныштын визыт да ашнаш налме шым йочам куштат. Татьяна ден Сергей Шабдаровмытын ешышт дене республикым вуйлатыше кеҥежым палыме лийын ыле, нунын дене уна лийын. Ешыште шым йоча, уныкаштат уло. Тамара Яранцева Волжский район гыч ашнаш налме вич йочам онча. Шкенжын кокыт да ашнаш налме ныл йочаже ынде кугу улыт. Юрино район гыч Лидия ден Евгений Овсянниковмытын икшывышт кугу улыт. Кок эргыштат военный лийыныт. Иктыже специальный сарзе операцийыште участвоватла, весыже военно-космический вийыште службым наҥгая. Марий Элым вуйлатыше чыла еш дене мутланен да неле, кӱлешан пашаштлан тауштен ойлен.
             Фото: Марий Элым вуйлатышын  администрацийжын увер дене пашам ыштыше пӧлкаже.

Прошлые выпуски