Волжскышко Украине, ДНР, ЛНР гыч ӧкым кайыше еҥ- влак толыныт

             Волжскышко Украине, ДНР, ЛНР гыч ӧкым кайыше еҥ- влак толыныт. Марий Эл Правительстве, Социал вияҥмаш министерстве, социал пашаеҥ, медик, волонтёр да МЧС-ын пашаеҥже- влак рушарнян нине кундемла гыч толшо калыкым вашлийыныт. Чылаже 51 еҥ толын. Нунын коклаште шоҥгыеҥ да йоча- влакат улыт. Нуным жаплан вераҥдыме пунктыш социал аралтыш пашаеҥ да психолог- влак ужатеныт. Волжск оласе «Волжский» унагудо комплексыште тора гыч толшо- влак каналиен да вийым поген кертыт. Медицина пашаеҥ- влак тӱҥалтыш тергымашым эртареныт, социал пашаеҥ- влак эре воктенышт улыт. Тачысе кече гыч нунылан пенсий фондын да миграций службын пашаеҥышт умылтарымашым эртарат, документ- влакым возгалаш полшат. Тидыже пенсионер- влаклан, инвалид да икшыван еш- влаклан социал оксам, материальный полышым налашлан кӱлеш. Пашавер службын специалистышт пашам муаш полшат. Йоча- влакым школ ден йоча садлашке налаш ямде улыт.
        Фото: Социал вияҥмаш министерстве.

Прошлые выпуски